Mostrando entradas con la etiqueta EVENTOS. Mostrar todas las entradas
Mostrando entradas con la etiqueta EVENTOS. Mostrar todas las entradas

27 feb 2011

Movistar levou o I+D ao Mobile World Congress #mwc11

Movistar levou ao seu stand no Mobile World Congress unha serie de proxectos de I+D que está a desenvolver, e que mirará de ir poñendo en funcionamento nos vindeiros meses, sempre e cando sexan de interese para a sociedade. Vexámolos algúns deles polo miúdo.

Multiconferencia inmersiva

Este proxecto vén motivado pola dificulade de comprensión en multiconferencias realizadas a través de Internet. É dicir, cantas máis persoas participan nela, máis difícil pode resultar o feito de identificalas. Neste sentido, usando este novo método de multiconferencia, dotarse a conversación de son envolvente, polo que poderemos detectar que persoa está falando por posicionamento espacial.

Poderemos pois, nunhas salas virtuais, colocar aos falantes e situalos en puntos que consideremos. O son escoitarase en función desta situación que teñamos escollido.

 O servizo está concebido para todo tipo de terminais e plataformas
Mobile Sound Sensor

Cuns teléfonos tan potentes como os que temos a día de hoxe, non é un pouco parvo levalos no peto sen facer nada? Iso é o que pensaron dende Movistar, e plantexáronse un sistema de escoita activa para certo tipo de alarmas. É dicir, cando o terminal escoita certo tipo de alarma, fai unha "cousa" determinada, que pode ser dende poñerse a gravar un vídeo, até enviar un sms de alarma ou unha mensaxe nunha rede social.

Entre eses ruídos predefinidos están o de cristal roto ou berros. Probamos in situ un exemplo no que escoitaba cristais rotos e enviaba un sms avisando diso.

Mensaxe de cristal roto
Tokes

Tokes é un servizo pensado para Latinoamérica, onde as redes de datos móbiles están pouco extendidas. Seica aló é moi típico facer "perdidas" para todo: avisar de que chegaches a un sitio, como saúdo... étc. Dende Movistar pensan que "é difícil determinar que significa un "toke" (algo que eu discuto, pois eu inda o uso para dicir "cheguei" e coido que se entende), polo que desenvolveron un servizo que o que fai é enviar un "toke" con significado. Vamos, como se mandaras un emoticono. Será un servizo máis barato que o sms. Sinceramente, teño as miñas dúbidas de que vaia ser un éxito.




Frigo reflections

Trátase dun servizo pensado na nube, que o que permite é capturar e compartir o estado das aplicacións entre usuarios e dispositivos. Xa non é que compartamos un arquivo na nube, como puidera ser un arquivo de Word a través de Dropbox para telo sincronizado en todos os nosos dispositivos, senón que ademáis, con este servizo, gardaríase o estado da aplicación.

É dicir, se ti tes un texto seleccionado no arquivo de Word, ao compartilo con Frigo terás o arquivo no mesmo estado. Cómodo non?


25 feb 2011

Probamos os dispositivos 3D de LG: LG Optimus 3D e Optimus Pad #mwc11

LG sorprendeu no Mobile World Congress coa presentación de 4 novos dispositivos: 3 smartphones e unha tablet. Mais a sorpresa non estaba na cantidades de dispositivos, senón nas características dalgúns deles: o LG Optimus 3D e a a LG Optimus Pad.

Ambos os dous veñen equipados con dúas cámaras traseiras para ter a capacidade de gravar contido en 3 dimensións e, no caso do móbil, visualizalo sen ter que empregar lentes especiais. Vexamos máis polo miúdo as súas características


LG Optimus 3D


Trátase do primeiro terminal capaz de reproducir contido en 3D sen necesidade de usar lentes, mais tamén ten a capacidade de gravalos, grazas á dobre cámara da que falabamos, ambas de 5 megapíxeles.

A súa pantalla é de 4.3 polgadas e conta cunha memoria interna de 8 GB, ampliábel outros 32 GB a través dunha tarxeta microSD. O seu procesador é dual-core a 1 GHz e polo demáis, o típico: conectividades de WiFi, redes móbiles até 3G, Bluetooth 3.0, brúxula, conexión HDMI...

Ademáis, LG e YouTube teñen asinado un acordo para poder compartir os vídeos en 3D gravados co terminal e podelos visualizar na pantalla do ordenador ou na televisión. Vexámolo en funcionamento:



LG Optimus Pad

Ademáis, LG sumouse ao carro das tablets Honeycomb (Android 3.0), co Optimus Pad, un dispositivo de 8.9 polgadas.

As características son semellantes ás do Optimus 3D, iso si, optimizado para tablets e con maior memoria interna (32 GB).

Pódese ver en funcionamento no seguinte vídeo:



24 feb 2011

HTC HD7 e Samsung Omnia 7, probamos os móbiles con Windows Phone 7 #mwc11

Non só de Android vive o home. Por iso, dende Mallando na e-ira, un blogue no que, no que a sistemas operativos móbiles defendemos Android, non quixemos perder a oportunidade de probar dous terminais con Windows Phone 7, o sistema operativo móbil de Microsoft.

Sen afondar moito, direi que ten unha interface bastante conseguida, moi chamativa visualmente falando, o que para un usuario pasivo (que non lle vaia sacar máis partido a un terminal ca mirar o correo, sacar fotos e redes sociais) é abondo. Agora que, para vós, que sodes usuarios esixentes (guiño guiño) e que queredes sacarlle o máximo partido ao voso móbil, non vo-lo recomendo.

Vexamos un pouco máis destes dous terminais

Samsung Omnia 7

O Omnia 7 con pantalla Super AMOLED de 4  polgadas e resolución de 480x800 e pantalla de 5 MP con autofocus.

O procesador está fabricado por Qualcomm e é de 1 GHz. Trae tamén unha memoria interna de 16 GB, ampliábel a través de microSD.

Ten WiFi, GPS, sensor de proximidade, acelerómetro, radio FM, Bluetooth.. vamos, que é dos que traen de todo. Podedes velo en funcionamento no seguinte vídeo



HTC HD7


O HD7 está fabricado por HTC e conta cunha pantalla táctil de 4.3 polgadas de 480x800 de resolución. Vén cun procesador de 1 GHz e 8 GB de memoria interna.

A cámara é de de 5 MP, con enfoque automático e dobre flash LED. Grava vídeo a 720p en HD. Todo o contido multimedia é facilmente compartíbel a través de SkyDrive, o disco duro virutual de Microsoft.

En canto a outros servizos, ten WiFi, GPS interno (vencellado a tecnoloxía Bing Maps), acelerómetro..

Vexámolo en vídeo




21 feb 2011

Powermat. Chega a revolución dos cargadores #mwc11

Só nos Estados Unidos, aparellos en stand by e cargadores que non se desenchufan cando non se está a usar, consumen 4000 millóns de dólares en enerxía, falando en termos económicos. É o que se coñece como enerxía vampírica e en Powermat saben moi ben o que é.

Powermat é unha empresa que se adica ao desarrollo de tecnoloxías de carga sen fíos grazas á indución. Pretenden que nun futuro non teñamos que depender dos cargadores con cable, algo que xa teñen bastante avanzado.

Dispoñen dunha completa gama de cargadores que están baseados nunha base que teremos conectada á corrente permanentemente, pero cun consumo desprezábel (de aí o que comentaba antes da enerxía vampírica; Powermat ten desarrolladas tecnoloxías que reducen á mínima expresión o consumo). Puidemos comprobar in situ isto, como podemos ver na seguinte imaxe

Sen estar cargando nada, non hai consumo
As bases poden ter forma de bandexa ou vir incorporadas en elementos como o pé dun flexo. Neste sentido, Powermat está a traballar con outras empresas, para colocar puntos de carga nas mesas das salas de espera dos aeroportos ou incrustadas nas guanteiras dos coches.

Prototipo de mesa de carga nos aeroportos
O sistema de Powermat vale para cargar case calquera cousa: mp3, iPhone, Blackberry, PSP, terminais Android... iso si non basta con poñer o aparello enriba, a cousa ten truco.

Para o caso, por exemplo, das Blackberry, teñen unha pequena lámina que se coloca pegada á batería, como se pode ver na seguinte imaxe, que é a que permite a carga por indución só con colocar dito smartphone enriba. Para iPhone, o sistema é algo diferente: colócase nunha especie de bumper (xa sabedes, unha especie de carcasa exterior). E para o resto, pois hai unha colección de adaptadores.

Para Blackberry teñen o sistema máis conseguido: só hai que colocar unha lámina pegada á batería
Probámolo

Dende Powermat facilitáronnos un kit completo para que puidéramos facer un análise no noso blogue. En concreto, un compatíbel co Nexus One, que resultou ser un con múltiples clavixas.

Kit completo
Como podemos ver na imaxe anterior, o kit completo ocmponse do xogo de clavixas, da bandexa de carga (neste caso unha bandexa dobre), e o enchufe co cable correspondente. Ese desexo dun mundo sen cables de Powermat é evidente no sistema de recollida destes, que quedan totalmente integrados nas partes físicas, nunca soltos.

Detalle da bandexa de carga
Detalle do xogo de adaptadores
Como se pode ver na imaxe anterior, o kit vén con 8 adaptadores para diferentes dispositivos, aos que hai que engadir un miniusb que vén na caixa de carga (dispositivo da parte superior, á dereita). Tamén trae unha pequena caixa (parte superior da imaxe, á esquerda), para gardar as clavixas.

Para poñer un dispositivo a cargar, debemos ter a bandexa conectada á toma de corrente (obvio). A partires de aí, cando queiramos poñer algo a cargar, conectaremos a caixa de carga co adaptador correspondente. Na imaxe podedes ver as conexións para o Nexus One.


Como podemos ver, a bandexa da esquerda permanece iluminada ao estar cargándose un dispositivo, mentres que a da esquerda fica apagada, non consumindo.

Coido que este sistema é realmente interesante e cómodo. Iso si, inda ten moito que avanzar, xa que tan só para a Blackberry podemos falar dun dispositivo completamente sen fíos: "chegar e pousar". Malia iso, creo que vai no bo camiño.

20 feb 2011

Fon, comparte a túa WiFi e desfruta de puntos de acceso de balde en todo o mundo #mwc11


Fon é unha compañía xurdida no 2005, que ten como obxetivo crear unha rede WiFi global, grazas á colaboración de todos os usuarios que forman parte do proxecto, os foneros.

O funcionamento é moi sinxelo. Dende Fon facilitan unha routers WiFi, que os foneros instalan na súa casa, enchufándoos ao router da súa operadora, compartindo parte da súa conexión a Internet. Á vez, este usuario consegue o privilexio de se conectar aos puntos WiFi doutros foneros. E onde están eses puntos? Pois a través da súa web, e de Google Maps, é posíbel ver en tempo real onde están situados e se están ou non operativos.

Distínguense 3 tipos de usuarios: os Aliens, os Linus e os Bill.
  • Aliens: son usuarios que non comparten, pero queren conectarse a un punto compartido. Neste caso cóbraselles polo acceso (1,20 € por 1 hora, 3 € por todo o día).
  • Bill: os Bill (de Bill Gates) son usuarios que comparten punto WiFi e se benefician de acceder a outros puntos WiFi doutros foneros de balde (temporalmente). A ganancia dalgún Alien que se conecte á súa rede irá o 50% para Fon e o 50% para el.
  • Linus: os Linus son usuarios que comparten punto WiFI e se benefician de acceder a outros puntos WiFi doutros foneros de balde. As ganancias das conexións dos Aliens ás sáus redes van enteiras para Fon.

A idea pode ser interesante, pero xurden algunhas dúbidas: hai suficientes puntos de acceso para que compense? Nas grandes cidades xa hai un núcleo interesante, nas vilas o tema xa está máis complicado. Neste sentido, Fon está a levar a cabo conversas con operadores, a modo de partners, nos que se o usuario o desexa pode pedir un router fonero en vez de telo que adquirir pola súa conta, o que pode dar pé a que máis xente se anime. Lamentabelmente, ningún dos operadores españois ten aínda convenio con Fon, inda que si en Portugal, con Zon, o principal operador de cable.

Unha idea semellante, a da creación dunha rede WiFi para clientes, tamén fora posta enriba da mesa por R, o operador galego de fibra óptica, inda que de momento este proxecto non está operativo. Compensaría que R se unise ao proxecto de Fon e os seus clientes se puideran conectar tamén fóra de Galiza?

Probámolo

Dende Fon facilitáronnos un router para que puidéramos probar o sistema. Concretamente, o router FONERA SIMPL. Na caixa atopamos o propio router, un cable ethernet e a toma de corrente.


A partires de aí, tan só teremos que conectar o cable de ethernet ao noso router, e o router á toma de corrente. En poucos segundos, aparecerannos dúas novas redes, MyPlace e FON_FREE_INTERNET.

Deberemos conectarnos á rede MyPlace, que vén con seguridade WPA e a clave situada na parte de abaixo do router. Unha vez conectados, accederemos ao panel do router poñendo no noso navegador o seguinte enderezo:

http://192.168.10.1

e clave admin. Procederemos entón a rexistrar o noso produto, para o cal teremos que crear un nome de usuario e contrasinal (que serán os mesmos que empregaremos para conectarnos noutros puntos de acceso de Fon.

E isto é todo, en poucos segundos teremos o noso punto operativo e poderemos acceder a outros puntos de acceso cos nosos datos. Para ilo, cando vexamos un punto de acceso FON_FREE_INTERNET, conectarémonos e, de seguido, ao acceder ao navegador, apareceranos un portal cautivo no que debemos poñer o noso usuario e clave. Con iso, xa poderemos navegar.

Playbook. Probamos a tablet de Blackberry #mwc11


Cuestión de evolución. Blackbery non ía quedar á marxe e presentou no Mobile World Congress a súa tablet, a Blackberry Playbook, un terminal que pesa 425 gramos e  ten unha pantalla de 7 polgadas con resolución de 1024x600.

Ten procesador de dobre núleo de 1 GHz e 1 GB de memoria RAM, o que permite unha capacidade de multitarefa espectacular, e unha experiencia bastante atractiva para xogos.

En canto a conexións, dispón de WiFi a/b/g/n, Bluetooth e conexión 3G, iso si, isto último a través dunha conexión sen fíos coa BlackBerry. Tamñen ten microUSB e micro HDMI.

A experiencia multimedia é bastante boa e dispón de dúas cámaras, unha traseira de 5 MP e unha dianteira de 3 MP, pensada para vídeochamada. Admite vídeo en HD e sonídeo stéreo.

No seguinte vídeo podedes ver a proba que lle fixemos.



19 feb 2011

Emporia. Telefonía móbil para todos #mwc11

Unha das perlas do Mobile World Congress foi o stand de Emporia. Emporia é unha empresa que xurdiu hai agora 20 anos, no 1991. Iniciou a súa andaina comercializando terminais fixos inarámbicos (os famosos DECT) para uso interior, así como tamén coa personalización de teléfonos con diversos temas.

Stand de Emporia no MWC 2011
Mais no 2000, a empresa deu un xiro de 180 graos ao seu modelo de negocio e plantexouse facer algo moito máis novidoso: terminais pensados para persoas maiores ou con dificultades de visión e/ou movemento.

Así pois, dende entón, Emporia ten posto no mercado unha completa gama de terminais nos que reinan teclados grandes, pantallas cun contraste fenomenal para ver os números con claridade e o mellor de todo: facilidade de uso.

Polo xeral, os móbiles da compañía contan cunhas liñas comúns a todos os mmodelos, pensadas para mellorar a experiencia de usuario:
  • Botóns de acceso directo laterais, que permiten o acceso directo a funcións básicas como sms.
  • Lanterna LED, que ademáis de funcionar como tal, tamén se iluminará ao recibir unha chamada (todo isto sumado a un volume bastante máis elevado ao habitual e vibración).
  • Mans libres: o que permite máis comodidade.
Ademáis, varios terminais contan cun botón de emerxencia, como o modelo Emporia LIFEplus. Ao presionalo, o terminal marca os números de emerxencia preconfigurados (un tras outro) até que alguén colla. De non ser así (ou para casos de ter caducada a tarxeta, non ter rede co noso operador..) a chamada pasará ao 112.

Detalle do botón de emerxencia nun terminal Emporia
Pola súa banda, o Emporia SAFETYplus engade aínda máis funcionalidades de seguranza: envía unha sms incluíndo o enderezo e a posición GPS da persoa en situación de alarma. Ademáis, incorpora un reloxo de pulseira cun botón de emerxencia que a persoa pode activar, inda que non teña o móbil ao alcance da man. A secuencia de eventos é a que segue:
  1. A persoa presiona un dos botóns de emerxencia, ben no terminal, ben no reloxo.
  2. O teléfono emite un sinal de alarma, para avisar de que se presionou o botón de emerxencia (por se acaso se fixo accidentalmente). De non ser apagada a alarma pásase ao paso 3.
  3. O terminal envía un sms ao primeiro número de emerxencia co enderezo da persoa que precisa axuda. Inmediatamente, fai tamén unha chamada a ese número.
  4. Se acepta a chamada, escoitará unha mensaxe de voz que indica que se trata dunha chamada de emerxencia e que ten un minuto para aceptala. Ao tempo recibe nun sms a posición GPS.
  5. O Emporia SAFETYplus acepta a chamada e pon o teléfono en mans libres, para que a persoa en situación de emerxencia poida falar (pensemos, por exemplo, nunha persoa maior que cae).
  6. No caso de que a primeira persoa non acepte a chamada, pasarase ao seguinte da lista. E así sucesivamente. De non ter resposta en ningún dos números predefinidos, contactarase co 112.
O terminal conta tamén con sensor de caídas, que activa de xeito automático a chamada de emerxencia.

Outros, como o Emporia ELEGANCE, contan cun deseño máis coidado, pensado para aquelas persoas que desexen un terminal menos chamativo. Iso si, conta co mesmo dispositivo de emerxencia que o anterior.

O Emporia ELEGANCE conta cun dock que amplía funcionalidades de radio e mans libres
Finalmente, destacar o Emporia SOLID, un modelo pensado para a práctica de deporte, xa que non rompe malia que caia e é capaz de resistir a auga e a suciedade. Ten ademáis unha autonomía de 25 días en espera.

Emporia SOLID. Verá a luz no primeiro trimestre do ano
Pódese consultar o catálogo completo da marca nesta ligazón.



Esquina empatía

O stand de Emporia contaba cun espazo denominado 'esquina empatía', no que grazas a unha luva e uns lentes especiais, fabricados por investigadores da University of Cambridge, os usuarios podían comprobar as dificultades vencelladas ao deterioro das funcións motrices nas mans e na visión. Tiven a oportunidade de probar esta simulación e comparar a sensación de uso dun terminal Emporia e dunha Blackberry(*) con estas dificultades engadidas, e as impresións foron moi positivas: mentres que no smartphone era incapaz de teclear correctamente o que quería, nin ver os números na pantalla, no terminal Emporia podíase con relativa facilidade.

(*) Comento o da Blackberry porque foi o terminal co que fixen a comparación, pero poderíase extender a calquera outro móbil ou smartphone de teclas pequenas.

18 feb 2011

Mallando volve a casa


Vodafone presenta un kit de emerxencia para catástrofes #mwc11

No Mobile World Congress non todo foron móbiles de últimísima xeración. Vodafone, en colaboración coa ONG francesa Telecom Sans Frontieres, presentou unha ferramenta ben interesante: unha estación base portábel totalmente autónoma, pensada para casos de emerxencia (inundacións, terremotos...) e que tan só precisa dunha toma de corrente para operar.


O sistema componse dun total de 3 maletas, cuxo peso máximo individual é de 32 Kg. Isto ten unha razón de ser: 32 Kg é o máximo de equipaxe por persoa que se permite nos voos comerciais.

Esas maletas conteñen todo o imprescindíbel para operar: un receptor/emisor (antena), un mástil plegábel, cableado, unha antena satélite e un ordenador portátil, que fará de centro xestor de comunicacións.

Tárdase tan só 40 minutos en desplegar todo o sistema e telo completamente operativo, e con el pódese dar cobertura nun radio de até 5 Km. Admite até 1000 disposivos conectados ao tempo, e está pensado para comunicacións entre os equipos de emerxencia, non para o conxunto da poboación.

En canto ás aplicacións que soporta, de momento só está pensado para voz e SMS, e pode configurarse para funcionar de dous xeitos: de maneira interna, entre teléfonos conectados á célula, ou co exterior, grazas a unha antena vía satélite.

O prototipo que vimos no Mobile World Congress está testado, mais non contarán co definitivo até dentro duns meses. De calquera xeito, trátase dunha iniciativa moi interesante, e un exemplo de como as telecomunicacións son imprescindíbeis en momentos críticos

16 feb 2011

Yoigo presenta os seus obxetivos para 2011 no #mwc11

Aproveitando o tirón mediático do Mobile World Congress, o cuarto operador con rede español, Yoigo, presentou hoxe en rolda de prensa a folla de ruta para este ano 2011.

O Conselleiro Delegado, Johan Andsjö, espera chegar aos 3 millóns de clientes antes de final de ano (na actualidade contan con 2,2), facendo melloras na rede. Neste sentido vén de asinar un convenio con Ericsson para extender a rede, que cubre o 67% da poboación, acadando un 74%, e con velocidades de 21 Mbps. Aproveitando a actualización da rede prepararán as estacións base para o despregamento da rede 4G, unha vez feitas as adxudicacións polo executivo.


Novo servizo de chamadas ao extranxeiro IP

Ademáis da información sobre a actualización de rede, Yoigo anunciou o lanzamento dun servizo, que comezará a súa fase beta o 1 de marzo, co que todos os seus clientes, independentemente do terminal que teñan, poderán facer chamadas aos fixos do extranxeiro a prezos moi económicos, grazas á utilización de telefonía IP e de forma sinxela: tan só terán que marcar dous asteriscos (**) antes do número internacional.

Poderase chamar a un total de 20 países e os prezos oscilan entre os 4 e os 7,5 céntimos/minuto (IVE a maiores):
  • 4 cént/min: UK, Suecia, Venezuela, Alemaña.
  • 4,5 cént/min: China, Francia, Holanda, Portugal, Italia, Bélxica, Polonia.
  • 5 cént/min: Marrocos
  • 5,5 cént/min: Rumanía
  • 6 cént/min: Brasil, Arxentina.
  • 6,5 cént/min: Chile, República Dominicana, Xeorxia.
  • 7 cént/min: Colombia
  • 7,5 cént/min: Paraguai.

Novo Bono 15 Internet Para Llevar


Tamén presentaron unha nova tarifa de datos, o Bono 15 Internet Para Llevar, que inclúe por 15 € (sen IVE) mensuais 1 GB de datos. Superada esa cantidade, os clientes poderán contratar outro GB adicional por 10 € ou seguir navegando a 64 Kbps.

2011, o ano Android

De maneira máis informal, Johan comentou que a compañía ten previsto apostar fortemente por terminais con Android, "xa que é aí onde está o futuro". Neste sentido, un dos terminais tamén estará dispoñíbel en tarxeta. Iso si, non precisou cales...

Sobre a mellora das tarifas e o hipotético quinto operador móbil dos cableiros

Tiven oportunidade de preguntarlle se tiñan previsto revisar algunhas das súas tarifas á baixa, ante o peso que están a ter neste campo os OMV e dixo que si, que non eran alleos aos movementos que está a facer o sector e que terán que adaptarse, así que é posíbel que vexamos novas tarifas antes do verán.

Preguntado sobre a unión táctica dos cableiros (R, Telecable, Euskaltel e Ono) para formar o quinto operador con rede, Johan amosouse dubidoso de que se levase adiante, ante as dificultades de que teñan asiganadas boas frecuencias que lles permitan invertir.

Axenda de Mallando na e-ira do mércores 16 no #mwc11

Hoxe temos a seguinte axenda confirmada, deixando o resto do tempo para explorar a fondo a feira

  • 10.00h - Rolda de prensa de Yoigo
  • 19.00h - Android Party

15 feb 2011

A keynote dos "top 5" da telefonía móbil mundial #mwc11

Non todos os días hai a oportunidade de ter xuntos aos 5 grandes da telefonía móbil mundial, léase América Móvil, AT&T, China Mobile, Telefónica e Vodafone; pero no Mobile World Congress todo é posíbel, así que aquí estiveron contando como ven o negocio dende a súa perspectiva.


O formato elixido consistiu en facer unha presentación xenérica, que correu a cargo de Robert Conway, CEO do GSMA para logo escoitar por separado aos diferentes CEO das operadoras. Iso si, no momento final, no que se agardaba ter a posibilidade de facer preguntas por parte dos asistentes, atopámonos que non, que o acto era pechado. Unha mágoa, tengo en conta que quedaron moitos flecos por aclarar.

Robert Conway comezou o acto amosando as cifras do sector: actualmente fanse arredor de 5 billóns de conexións móbiles en todo o mundo, e todo apunta a que antes de rematar o 2011 chegarase aos 6 billóns.

Ademáis, apuntou que as conexións de alta velocidade móbil en 3G superan os 500 millóns. En canto ao despregamento do LTE, coñecido como 4G, hai na actualidade 18 redes móbiles operativas en todo o mundo, ás que se lle suman outras 184 xa planificadas.

Todos estes avances farán posíbel que no prazo de dous anos haxa máis xente conectándose a Internet co móbil que mediante Internet fixo, e favorecerá o despregamento de tecnoloxías chamadas a facilitar a vida, como os NFC (Near Field Communication), eses chips que, por exemplo, xa podemos atopar nos últimos dispositivos Android.

Wang Jianzhou, CEO de China Mobile foi o primeiro en tomar a palabra. Presumiu de que o traballo dos operadores de todo o mundo permite ter o 98% da poboación mundial con cobertura, que non o territorio, (cifra que persoalmente me parece algo esaxerada), chegando a sitios inóspitos (estacións na Antártida, altas montañas...)

Jianzhou preguntouse que solución habería que tomar para aliviar a conxestión do tráfico de Internet ante o crecente interese e precisou que unha alternativa viábel era extender a cobertura WiFi, e desviar o tráfico de datos por redes físicas.

Tamén deixou unha pregunta no aire: que cambios hai que facer no modelo de negocio do Internet móbil?


Pola súa banda, Vittorio Colao, CEO de Vodafone, tamén fixo especial fincapé no importante crecemento que está a haber no tráfico, inda que non se vexa tan reflexado este crecemento en infraestrutura de rede.

Amosou o seu asombro polo crecemento de Android, "unha plataforma aberta", e non dubidou en parabenizar a Google polo éxito acadado.


Asegurou ademáis que Vodafone conta con importantes alternativas de conectividade (referíndose a routers varios, MiFis...), e fixo especial fincapé nas prioridades da compañía para o 2011, que pasan pola creación de redes de nova xeración, coa extensión do LTE e HSPA+, contar cos mellores dispositivos (smartphones e tablets), ofrecer novos servizos (colaboración con partners para ter servizos avanzados, transferencia de fotos entre 2 contactos durante unha chamada) e melloras en países en vía de desenvolvemento, para facer "unha sociedade mellor".

Comentou tamén que Vodafone conta cunha sorte de "kits" de emerxencia, trátanse dunhas estacións base grazas ás cales é posíbel montar unha rede móbil operativa en 40 minutos, pensado para catástrofes e similares.

Dixo, para resumir, que as claves de Vodafone baseábanse na cooperación, apertura e competición.

Daniel Hajj, CEO de América Móvil, fixo unha presentación moito menos entusiasta, na que simplemente presentou as cifras da telefonía móbil en América Latina, onde nos últimos tempos comezou a haber un interese polos datos, malia seguir nun níveis un tanto baixos, en comparanza co resto do mundo.

Neste sentido, afirmou que a día de hoxe tan só 65 millóns dos 600 habitantes de Latinoamérica teñen acceso a datos. Malia iso, pretenden chegar aos 400 millóns de usuarios de smartphones en 2016, algo que me parece un tanto esaxerado.

César Alierta, o CEO de Telefónica, fixo unha presentación bastante breve, na que destacou que a industria da telefonía móbil ten grandes espectativas de crecemento, debido ao auxe dos datos móbiles e afirmou que se precisaban novos modelos de negocio no sector.


Pechou o encontro Randall Stephenson, CEO da compañía norteamericana AT&T, quen destacou o feito de que cada vez temos máis dispositivos que se conectan a Internet (computadores, vídeoconsola,s móbiles, tablets, televisións...) e exemplificou a gran cantidade de oportunidades que iso nos ofrece, como a posibilidade de mercar un e-book ou unha canción e desfrutala en varios dispositivos, dependendo da nosa necesidade no momento.

Pechou a súa ponencia coas claves que consideran básicas para o crecemento do sector: incrementar o espectro, ter unha regulación máis flexíbel  e facilitar o acceso ás aplicacións.


Axenda de Mallando na e-ira do martes 18 no #mwc11

A axenda fixa de Mallando na e-ira deste martes no Mobile World Congress é a seguinte. A maiores, pode que se cubran máis eventos, ficade atentos ás nosas redes sociais!
  • 09.00h - Keynote: Unha visión dende o alto, con Robert G Conway (CEO e membro do GSMA), Daniel Hajj, CEO de America Movil), Randall Stephenson (CEO de AT&T), Wang Jianzhou (CEO de China Mobile), César Alierta (CEO de Telefónica) e Vittorio Colao (CEO de Vodafone).
  • 17.45h - Keynote: Eric Smicht (CEO de Google).
  • 18.00h - Evento HTC Bloggers
  • 20.00h - Evento/festa HTC

Imaxes das keynotes de Microsoft e Twitter #mwc11

Inda que nos costou, conseguimos entrar nas keynotes de Esteve Ballmer (CEO de Microsoft) e Dick Costolo (CEO de Twitter). Velaquí unhas imaxes do evento

Esteve Ballmer, CEO de Microsoft
Stephen Elop, CEO de Nokia
Dick Costolo, CEO de Twitter
Dick Costolo, CEO de Twitter

14 feb 2011

LG aposta forte polo 3D #mwc11

Nunha presentación presidida por Jong-Seok Park, CEO e presidente, quen fixo un breve repaso polos logros da compañía, LG sentou as bases para un mundo en 3 dimensións, presentando o Optimus 3D e o Optimus Pad.

Optimus 3D

LG aposta forte polo mundo en 3D, ofrecéndoo como o "máis parecido á vida real", por suposto sen ter que usar lentes para disfrutar del. Para ilo, o seu Optimus 3D conta con dúas cámaras de 5 megapíxeles separadas 24 mm (imprescindíbel para ofrecer a visión en 3D)


O Optimus 3D é o primeiro terminal con dobre procesador, dobre memoria e dobre canle, o que permite unha carga moito máis rápida de páxinas web e saída HDMI

Optimus Pad

LG decidiu apostar por unha tableta que, nas súas palabras, fose útil tanto para traballo como para ocio. Na presentación fixeron especial fincapé na diferenciación sobre outros produtos cuxos sistemas operativos non estaban optimizados para tablets (en clara alusión á Galaxy Tab) ou que pesaban demasiado (referenciando o iPad).

Basearon o deseño da nova tablet en 3 piares, que forman a palabra PAD (de Optimus Pad): Productividade, Advanced Multimedia e Deseño e Portabilidade).

Conta con dual core, Android Honeycomb (3.0), multitasking e unha navegación moito máis rápida.

En canto á multimedia, tamén conta con dúas cámaras de 5 megapíxeles que lle dan a posibilidade de gravar vídeos en 3 dimensións. A saída HDMI ofrece a posibilidade de enchufar unha televisión en 3 dimensións, para desfrutar do noso contido.

Finalmente, no que ten a ver co deseño, ten unha pantalla de 9,7 polgadas e pesa de 630 gramos.

Ademáis, informaron da chegada de outros 2 smartphones, o Optimus 2Xe e o Optimus Black, pero non deron información deles. Verémolos na feira e contarémolo.

Estarán dispoñíbeis en Europa dende maio.

Axenda de Mallando na e-ira do luns 17 no #mwc11

O día en que abre as portas o Mobile World Congress, Mallando na e-ira terá a seguinte axenda:
  • 11.00h - Presentación LG
  • 15.00h - Encontro con Samsung
  • 16.00h - Keynote Esteve Ballmer (CEO de Microsoft)
  • 17.00h - Keynote Dick Costolo (CEO de Twitter)
  • 19.00h - Entrevista para o programa de radio BCN Atlántica

6 feb 2011

Mallando visitará a Comisión do Mercado das Telecomunicacións

O domingo pasado anunciabamos que Mallando na e-ira viaxará até Barcelona para seguir o Mobile World Congress que se celebra entre os días 14 e 17 de febreiro na Fira de Barcelona.

Aproveitando esta visita especial, non podíamos desaproveitar a ocasión de visitar as instalacións da Comisión del Mercado de las Telecomunicaciones (CMT), o ente encargado de establecer e supervisar as obrigacións que deben cumplir os operadores nos mercados de telecomunicacións e o fomento da competencia nos mercados dos servizos audiovisuais.

Aló manteremos unha conversa con responsábeis da entidade para falar do futuro da banda larga móbil e tamén do estado das telecomunicacións en Galiza. 

Calquera achega que queirades facer, podedes enviala por correo a iago(at)mallando.com

Vista da sede da CMT. Fonte da imaxe: Flickr da CMT

30 ene 2011

Mallando estará no Mobile World Congress de Barcelona #mwc11


O Mobile World Congress (MWC) é un congreso de carácter anual que se celebrará en Barcelona entre o 14 e o 17 de febreiro e que xira entorno ao mundo da comunicación móbil, pretendendo fomentar a colaboración internacional nas tecnoloxías de comunicación móbil. É ademáis, xunto ao CES de Las Vegas, o espazo no que levan a cabo o maior número de presentacións en materia de solucións móbiles.

Mallando na e-ira, como non podería ser doutro xeito, desprazarase até Barcelona para seguir en directo todo o que aló aconteza e contárvolo, como xa o fixemos durante SIMO Network. Será a primera vez que un evento destas características sexa retransmitido en directo e in situ en galego, reto que afrontamos con moita ilusión, máis tamén con moita responsabilidade.

Comentar finalmente, que alén das entradas do blogue, faremos un seguimento especial a través das contas de Twitter  @mallando e @iagovarela.

Se queres enviarnos suxerencias para o MWC ou se tamén vas e queres que manteñamos unha xuntanza en Barcelona, escribe un correo a iago(at)mallando.com

Podedes ver un adianto do que nos atoparemos en Barcelona neste vídeo.

16 oct 2010

Mallando Eventos. SIMO Network 2010 (e VIII): Conclusións

Entrada do pavillón de SIMO Network 2010

Con este oitavo post, rematamos a cobertura especial de Mallando na e-ira en SIMO Network 2010. Foron 3 días intensos nos que quixemos estar presentes en Madrid para poder falar cos responsábeis das diferentes empresas participantes en primeira persoa e ofrecervos a información directamente, sen intermediarios.

O feito de que hoxe en día sexa unha feira totalmente profesional permitiunos coñecer máis a fondo os novos proxectos do sector TIC, xa que cun menor público o tratamento é moito máis persoal, pódense facer demostracións, etc.

Como avanzaba nunha entrada anterior, este ano houbo moito espazo para a computación na nube, pois parece que as necesidades do mercado van nese sentido. De feito, coa chegada da mobilidade a Internet (do "todo o mundo ten un pincho 3G para conectar ao seu portátil"), multiplícanse as posibilidades de traballo en calquera lugar, e é moi cómodo ter todo o que precisas para traballar en calquera computador con acceso a Internet, mesmo independentemente do sistema operativo que teña instalado.

Ademais, sorprenderon as notábeis ausencias das operadoras de telecomunicacións que, sacando o caso de Vodafone, non tiveron o seu stand de rigor, como en edicións anteriores.

Finalmente, destacar o chamado Open Green, un espazo no que se exprimiron as posibilidades do networking e no que as empresas puideron recibir asesoramento sobre marketing tecnolóxico, dar a coñecer a súa tenoloxía, establecer contactos e alianzas... todo o necesario para multiplicar as posibilidades do sector TIC do Estado.

40 páxinas de apuntamentos, 8 GB de multimedia, e moitos quilos de información en dípticos e outros formatos derón pé a esta crónica de 8 entradas. Agardo que vos resultase interesante e entretida.

Xa para rematar, quixera aproveitar para agradecer dende aquí a todas as persoas que nos atenderon na feira e que cederon a súa imaxe para poder facer a crónica o máis multimedia posíbel. Tamén agradecerlle a Carmen Denébola a súa colaboración en todo o tema de imaxe (gravación/edición de vídeo e toma de fotos).