Mostrando entradas con la etiqueta simo network. Mostrar todas las entradas
Mostrando entradas con la etiqueta simo network. Mostrar todas las entradas

16 oct 2010

Mallando Eventos. SIMO Network 2010 (e VIII): Conclusións

Entrada do pavillón de SIMO Network 2010

Con este oitavo post, rematamos a cobertura especial de Mallando na e-ira en SIMO Network 2010. Foron 3 días intensos nos que quixemos estar presentes en Madrid para poder falar cos responsábeis das diferentes empresas participantes en primeira persoa e ofrecervos a información directamente, sen intermediarios.

O feito de que hoxe en día sexa unha feira totalmente profesional permitiunos coñecer máis a fondo os novos proxectos do sector TIC, xa que cun menor público o tratamento é moito máis persoal, pódense facer demostracións, etc.

Como avanzaba nunha entrada anterior, este ano houbo moito espazo para a computación na nube, pois parece que as necesidades do mercado van nese sentido. De feito, coa chegada da mobilidade a Internet (do "todo o mundo ten un pincho 3G para conectar ao seu portátil"), multiplícanse as posibilidades de traballo en calquera lugar, e é moi cómodo ter todo o que precisas para traballar en calquera computador con acceso a Internet, mesmo independentemente do sistema operativo que teña instalado.

Ademais, sorprenderon as notábeis ausencias das operadoras de telecomunicacións que, sacando o caso de Vodafone, non tiveron o seu stand de rigor, como en edicións anteriores.

Finalmente, destacar o chamado Open Green, un espazo no que se exprimiron as posibilidades do networking e no que as empresas puideron recibir asesoramento sobre marketing tecnolóxico, dar a coñecer a súa tenoloxía, establecer contactos e alianzas... todo o necesario para multiplicar as posibilidades do sector TIC do Estado.

40 páxinas de apuntamentos, 8 GB de multimedia, e moitos quilos de información en dípticos e outros formatos derón pé a esta crónica de 8 entradas. Agardo que vos resultase interesante e entretida.

Xa para rematar, quixera aproveitar para agradecer dende aquí a todas as persoas que nos atenderon na feira e que cederon a súa imaxe para poder facer a crónica o máis multimedia posíbel. Tamén agradecerlle a Carmen Denébola a súa colaboración en todo o tema de imaxe (gravación/edición de vídeo e toma de fotos).

15 oct 2010

Mallando Eventos. SIMO Network 2010 (VII): Partners e destacados

Nube, nube e máis nube.

O cloudcomputing estivo moi presente nesta edición de SIMO Network. Varias empresas como Astein , Cloudbuilder ou Panda, presentaron solucións de virtualización, as cales teñen moitas vantaxes para os clientes, destacando a non necesidade de contar con máquinas cos recursos instalados, o que fomenta a posibilidade da mobilidade do lugar de traballo: en calquera lugar, cando quera.

Imaxe do stand de Astein

Así, PANDA presentou varias solucións de seguridade baseadas na nube. Todas elas utilizan unha tecnoloxía denominada Intelixencia Colectiva, un sistema automático de deteción, análise, clasificación e desinfeción de malware.
  • Panda Cloud Office Protection, a solución para equipos e servidores. Ao estar na nube, trátase dunha protección moi lixeira e que come poucos recursos. Ademais, ten un plus de sinxeleza para a xestión e mantemento, con operacións e información centralizadas nunha consola web.
  • Panda Cloud Email Protection, pensado para servizos de correo coorporativo. O filtrado de email axuda a optimizar os recursos de banda ancha das empresas.
  • Panda Cloud Internet Protection, produto pensado para a navegación web, con posibilidade de configurar distintos níveis de seguranza, acceso etc.

Os comerciais de Panda fixéronnos unha demostración dos seus produtos en directo

SAGE

SAGE é unha compañía que ofrece solucións de xestión para empresas, como software para levar a contabilidade, facturación, nóminas...

Imaxe do stand de SAGE

Contaron cun stand bastante amplio con moitos espazos para poder falar con clientes dun xeito próximo. Ademais, durante 3 veces ao día sorprendían cunha actuación acrobática, que podedes ver neste vídeo:



SAP

SAP é unha compañía especializada en software de xestión empresarial. No seu stand en SIMO Network, o máis grande da feira con 900 metros cadrados, fixeron espazo a 8 partners importantes: Altim, Clariba, Ecinsa, Grupotec, Inforges, Quantum Tech, Saptech, Seidor e Tecnocom.

SAP amosou en SIMO Network algunhas das aplicacións máis novidosas

Ademais, amosaron en diferentes escenarios como afectan as súas aplicacións tecnolóxicas a mellorar a calidade de vida diaria dos cidadáns. Entre estas aplicacións estaban algunha das máis novidosas, como unha de identificación de falsificacións de todo tipo de obxectos ou solucións para coches eléctricos.

OKI

OKI, a sonada marca de copiadoras, tamén fabrica solucións de rede, que teñen bastante éxito, malia que no Estado español non sexa a súa principal fonte de beneficios.

Imaxe do stand de OKI

Neste sentido, presentou algunha solución de telefonía IP, como a centraliña IP1000, pensada para PEMES. Este dispositivo integra telefonía analóxica e dixital e presta diversos servizos, como identificación de chamadas, mobile twinning para facer chamadas máis baratas a redes móbiles, música de espera....

DELL

Dell achegou unha completa gama de portátiles, mais tamén outro tipo de sistemas para uso compartido de memorias.

Imaxe do stand de Dell
WIFISAFE

Wifisafe é unha empresa adicada a proveer ferramentas para crear redes WIFI e Wimax. Achegou á feira algún dos seus produtos a modo de exposición.

AETIC

AETIC é o acrónimo de Asociación de Empresas de Tecnoloxías da Información e Comunicacións. Con máis de 3000 asociados, empresas e colectivos empresariais, busca a promoción do desarrollo do sector TIC, sobre todo naqueles aspectos que teñen a ver coa xeración de valor engadido e de actividade industrial.

Imaxe do stand da AETIC

Multimedia

14 oct 2010

Mallando Eventos. SIMO Network 2010 (VI): Opentrad, Lleida.net e Workscreen

Na entrada de hoxe analizaremos tres empresas, cuxos proxectos nos pareceron ben interesantes: Opentrad, Llleida.net e Workscreen.

Opentrad

Opentrad é unha plataforma de servizos de tradución automática en código aberto, capaz de traducir entre máis de 20 pares de idiomas, entre eles o galego.

Permite traducir textos, documentos e navegar por Internet en diferentes idiomas, alén de achegar unha ferramenta para páxinas empresarias ou blogues multilingües.

Ten a vantaxe de ser configurábel e adaptábel ás necesidades do cliente, pensado en termos de software libre, o que optimiza a inversión tecnolóxica ao non ter que mercar licenzas.

Diego Vázquez (esquerda) e Ibon Aizpurua no stand de Opentrad en SIMO Network 2010

Durante SIMO, puidemos falar con Ibon Aizpurua (@epiola) , de Ingeniaritza Eleka linguistikoa, e Diego Vázquez, de Imaxin Software. Con este último, gravamos unha pequena entrevista:



Lleida.net

Lleida.net (lembrádesvos de IRC?) é a primeira operadora de SMS, líder no sector das mensaxes curtas e multimedia. Leva máis de 12 anos adicándose a este sector e a día de hoxe efectúase a través da súa rede máis de un millón de transacións diarias para o envío e recepción de SMS.

Entre os seus clientes están as Administracións públicas, os partidos políticos, medios de comunicación, PEMES e grandes empresas de multitude de sectores.

Foron a SIMO presentando as MMS Certificadas, un servizo que permite certificar en minutos algún suceso, aforrando papeleo e custos. Un uso posíbel é o dos partes de accidente. Neste sentido, dende o lugar do suceso poderíase sacar unha foto co móbil e enviar o parte por MMS á aseguradora, axilizando trámites.

Falamos con Manuel Ruíz, Director de Atención ao Cliente de Lleida.net



Workscreen

Workscreen presentou en SIMO un novo catálogo de pizarras dixitais, que pretenden popularizar nun entorno corporativo, logo do seu éxito na educación, onde Galiza destaca no uso das mesmas. Falamos con Juan, quen nos fixo unha demostración do que podemos facer con elas.


13 oct 2010

Mallando Eventos. SIMO Network 2010 (V): Plan Avanza 2


Stand do Plan Avanza 2 en SIMO Network 2010

O Plan Avanza naceu en 2004 co obxetivo principal de acadar a aceptación social das Tecnoloxías da Información e da Comunicación e a cobertura global dos seus servizos. Supuxo a mobilización de máis de 12.000 millóns de euros en 5 anos, 8.000 millóns de fondos estatais e 4.500 millóns do sector privado e doutras Administracións (CCAA, deputacións...).

Malia que queda moito por facer e este tipo de cifras hai que lelas con cautela, o Estado español situaríase xunto a Malta entre os países cunha maior penetración da banda larga na empresa (un 98% das empresas contan con este servizo). Ademais, conta con 27 millóns de internautas, está entre os 3 países líderes a nível mundial en porcentaxe de usuarios activos en redes sociais, o 95% dos fogares que se conectan a Internet fanno con conexións de banda larga, a penetración da telefonía móbil é do 118% e mantense líder en usuarios con identificación electrónica grazas á implantación universal do DNI-E.

Rafael Chávarri, Director de Comunicación de Red.es, falou para Mallando do Plan Avanza

Coa segunda parte do Plan Avanza, o Plan Avanza 2, quérese ir máis aló. Pensado para desenvolverse entre o 2010 e 2015, pretende facer do Estado español un líder no desenrolo e uso de produtos TIC, sendo os seus piares básicos os que seguen:
  • Desenrolo do sector TIC, apoiando ás empresas que desenrolen novos produtos, procesos, aplicación, contidos ou servizos TIC.
  • Capacitación TIC, incentivando a incorporación masiva de cidadáns e empresas á Sociedade da Información.
  • Servizos Públicos Dixitais, mellora e dixitalización dos servizos prestados pola Administración pública na rede.
  • Infraestrutura, co impulso á implantación da Sociedade da Información en entornos locais e a aplicación da nova normativa de infraestrutura de telecomunicacións en edificios e canalizacións de telecomunicacións en dominio público.
Para ilo, pularase por ter en 2015 a Administración sen papeis, así como tamén por mellorar as redes de telecomunicacións, tanto fixas coma móbiles, facéndoas ultrarrápidas.

Na nosa visita, puidemos entrevistarnos con Rafael Chávarri, Director de Comunicación de Red.es


12 oct 2010

Mallando Eventos. SIMO Network 2010 (IV): HP

Vista xeral do stand de HP

HP foi un dos partners de SIMO Network 2010, quizais por iso contaba cun dos stands máis completos da feira. Ademais, aproveitou o evento para presentar novos produtos, algúns deles orientados ao mundo 3D, mais tampouco faltaron portátiles e netbooks, algún un tanto curioso.

Compaq Airlife 100

É un smartphone? É un ultraportátil? É ambas cousas. HP achegou á feira o Compaq Airlife 100, un dispositivo que se ben xa fora presentado aló polo mes de abril, non houbo unha campaña potente de lanzamento.

Trátase dun ultraportátil con conexión 3G (leva inserida unha tarxeta SIM exclusiva de Movistar, malia que posúe outro tipo de conexións como WiFi ou BlueTooth), que pretende ser unha solución de mobilidade. Ten unha pantalla táctil de 10.1 polgadas, teclado completo e como sistema operativo Android 1.6. Ademais, posúe unha batería de longa duración, acadando 12 horas de traballo ou 10 días en standby. Pero se hai algo que chama a atención é o arranque instantáneo: con tan só levantar a pantalla teremos o dispositivo operativo para acceder ao noso correo electrónico ou navegar por Internet.

Non terá posibilidade de actualización a versións posteriores de Android e tampouco ten acceso ao Android Market tal e como o coñecemos, xa que Google non certifica a priori as aplicacións para este tipo de pantallas. Neste sentido, poderemos acceder a un Market de HP no que aparecerán as aplicacións certificadas por HP para o tipo de pantalla que leva este dispositivo.

Entrevistámonos con Javier Pascual, membro de HP e Responsábel de Formación da Cadena Telyco.



Pensar en grande

Máis aló deste dispositivo, HP foi a SIMO facendo un chamamento ás PEMES e emprendedores a "Pensar en grande", no sentido de ofrecerlles solucións tecnolóxicas avanzadas para facer realidade calquera proxecto empresarial.

Ademais, achegaron novos dispositivos dotados de tecnoloxía 3D: A HP Designjet 3D, unha impresora de pezas físicas a partires de planos ou o HP Envy 17 3D Edition, un portátil para creadores de contidos 3D, como deseñadores de pezas mecánicas, arquitectónicas ou para animación
Imaxe da HP Designjet 3D
Multimedia

11 oct 2010

Mallando Eventos. SIMO Network 2010 (III): Entrevista a Vodafone

Despois das presentacións de servizos e produtos que fixo Vodafone durante SIMO Network, entrevistámonos con José Romero, Director de Comunicación de Vodafone.


Mallando Eventos. SIMO Network 2010 (II): Vodafone

Vista xeral do stand de Vodafone en SIMO Network 2010

Se nos segues no Twitter (se non, xa estás tardando :P), verías que cubrimos en directo as presentacións de Vodafone durante SIMO Network 2010. Foron un total de 3 eventos nos que a compañía británica presentou 2 smartphones, unha tablet e 2 novos servizos. Imos detallalos:

A Galaxy Tab

Ignacion Román, Director da Undidade de Negocio de Terminais de Vodafone, e Celestino García, Director da División de Telecom de Samsung Iberia, presentaron a Galaxy Tab, a primeira tablet que fabrica Samsung. Equipada co sistema operativo Android 2.2 (FroYo), a tablet conta cunha pantalla de 7 polgadas e pesa tan só 380 gramos, o que fai dela un dispositivo idóneo para a mobilidade, en contraposición con outras tablets maiores, de 9 ou 10 polgadas (léase, iPad), pensadas para un uso máis doméstico.

Conta con conectividade WiFi e 3G, cámara de 3 megapíxeles con flash LED (un pouco xusto para o que se ve a día de hoxe nos smartphones, non?), A-GPS, vídeo en alta definición, función teléfono... e todo o que queiramos engadirlle grazas ao basto catálogo de aplicacións do Android Market. Haberá dous modelos, un con 16 e outro con 32 GB de memoria, inda que esta poderá ser ampliada con tarxetas microSD.

Sen cinguirse máis nas especificacións técnicas (que podedes consultar acó), farei unha análise máis subxetiva. Tiven a oportunidade de probala e a verdade é que houbo química entre nós: é moi lixeira (a metade que o iPad) e adáptase perfectamente á man. A súa pantalla é do tamaño axeitado para unha navegación por blogues e webs, e xa non digamos para consultar mapas ou disfrutar de vídeos.

Neste sentido, Samsung quere que se aproveite ao máximo a calidade da súa pantalla para reprodución multimedia, polo que puxo en marcha Samsung Movies, un servizo de alugueiro de filmes en streaming durante 24 horas, que probamos sobre a rede 3G de Vodafone e funcionou moi ben, sen cortes na reprodución.

Comentar que Vodafone lanzará a Galaxy Tab o 15 de outubro e terá a súa exclusiva durante un mes.

Así se ve Mallando na e-ira na nova Samsung Galaxy Tab

Vídeos da presentación:






Vodafone Internet TV e Vodafone en tu casa táctil.

Os dous servizos presentados por Vodafone foron na liña de acadar o fogar conectado.

Vodafone en tu casa táctil

Trátase dun servizo de navegación básico por Internet vencellado á telefonía fixa de Vodafone que, a través dunha tablet de 7 polgadas deseñada pola operadora e Huawei (con patente española, non se distribúe noutros estados), permite realizar chamadas de voz, ver titulares de prensa, correo electrónico, reprodución de multimedia e información meteorolóxica, alén de poder funcionar como marco de fotos dixital. Distribuirase xunto con dous inarámbicos.

Vodafone en tu casa táctil leva unha tablet e dous inarámbicos

Vodafone Internet TV

Con Vodafone Internet TV preténdese facer da televisión o centro de ocio do fogar, aproveitando as posibilidades da TDT, xunto coa reprodución de contidos multimedia situados en computadores, teléfonos móbiles, discos duros (multimedia ou non)... ou as canles de televisión á carta dispoñíbeis en Internet, como TVE á carta.

Decodificador da Vodafone Internet TV, xunto con router, o mando e un disco duro

O decodificador que ofrecerá Vodafone está adaptado á TDT de pago e alta definición, sendo o primeiro dispositivo que combina estas dúas características. Ademais, para poder disfrutar deste servizo tan só será preciso contar cunha conexión a Internet de banda larga (3 Mb mínimo, recomendábeis 6 Mb).

Entre as súas características máis destacadas están a gravación por defecto dende 3 horas antes ao momento actual, polo que podes, por exemplo, poñer en pause unha película que estás a ver, ir a facerte uns flocos de millo, volver e continuar dende ese punto e mesmo rebobinar.

Puidemos probar ambos servizos. Sobre Vodafone en tu casa táctil dicir que pode ser un servizo acaído para persoas maiores, dado que o funcionamento é moi sinxelo e obvio, demasiado sinxelo (e con funcións moi limitadas) para alguén que navegue habitualmente por Internet. Doutra banda, Vodafone Internet TV pintou bastante ben, xa que resulta moi cómodo dispor de todo o contido multimedia do fogar accesíbel dende un único aparello. O que si, o decodificador de televisión non conta con disco duro interno, polo que é preciso contar con un que poderemos conectar vía USB, por exemplo

Preguntados pola inminente chegada de GoogleTV, dende Vodafone comentaron que non lles parece unha competencia directa, xa que o produto de Google inda vai tardar en chegar a España e, en principio, non está adaptado ao consumo de televisión do mercado español.

Vídeo da presentación de Vodafone Internet TV



HTC Desire HD e HTC Desire Z

Finalmente, presentáronse dous modelos de smartphones moi agardados: o HTC Desire HD e o HTC Desire Z, ambos con Android 2.2 e cun evolucionado HTC Sense 2.0 con novidades como HTCSense.com, unha gama de servizos conectados chamados a facilitar a experiencia de usuario.

Así, sobre o Android 2.2 base, HTC inclue novas características como FastBoot (reinicio rápido en 5 segundos), a posibilidade de etiquetar amigos nas fotos que se suben a Facebook, un flip para ver as 7 pantallas nunha soa, HTC Locations (mapas sen conexión, de balde e accesíbeis en roaming), efectos de cámara, melloras no cambio de pestanas no navegador...

Outra característica do HTCSense.com que chamou moito a atención é a seguridade. Dende a web, poderemos ter 4 níveis de alerta para casos de pérdida do noso terminal:
  • Alerta azul. Pensada para cando non sabemos onde temos o noso móbil. Dende o computador poderemos ver a súa posición aproximada (por GPS) e facer que soe, inda que o tivéramos en silencio.
  • Alerta amarela. Para cando olvidamos o teléfono na casa. Poderemos ver dende a web as chamadas perdidas, sms... e facer desvíos.
  • Alerta ámbar: Esta alerta está pensada para cando perdemos o noso móbil e queremos mandarlle unha mensaxe á "alma caritativa" que o atope. Bloquéase o teléfono e facemos que apareza na pantalla a mensaxe que queiramos, e mesmo podemos configurar un botón para que nos chamen directamente.
  • Alerta vermella: a definitiva. Cando non funciona a ámbar, facemos un borrado total do que hai no teléfono.
Os dous novos terminais de HTC: Desire HD e Desire Z

HTC Desire HD

Ten pantalla de 4,3 polgadas e son Dolby Mobile. Grava vídeo en alta resolución de 720p. Ten unha cámara de 8 megapíxeles con doble flash... máis características acó

HTC Desire Z

Conta con teclado Qwerty con accesos directos e teclas personalizábeis. Grava tamén vídeo en 720p, pero a súa cámara é de 5 megapíxeles cun único flash... máis características acó

Pero imos coas impresións: despois de cacharrear con ambos, teño que dicir que as impresións son case que inmellorábeis en dous terminais de moi altas prestacións. O Desire HD resulta moi cómodo para o contido multimedia e a lectura, mais tamén é certo que para o meu gusto quizais sexa algo pesado de máis. Sen embargo, o Desire Z pareceume moito máis cómodo, e o feito de contar cun teclado físico (ademais con teclas configurábeis) é de agradecer.

De calquera xeito, ambos os dous terminais son altamente recomendábeis. Vodafone terá a exclusiva de ambos até despois da campaña de Nadal, a partires de aí libres.

Multimedia

10 oct 2010

SIMO Network 2010 (I): O vídeo

Entre o 5 e o 7 de outubro estivemos en Madrid, seguindo en directo SIMO Network 2010. Neste tempo, tivemos ocasión de asistir a varias presentacións de produtos e servizos, así como tamén de manter entrevistas con responsábeis de varias empresas que nos comentaron a que se dedicaban e os seus motivos para estar en SIMO.

Moitas páxinas de notas, moitas fotos e algún que outro vídeo. A feira, resumida en 10 minutos de vídeo resumo - trailer, gravado e editado coa axuda de Carmen Denébola.



Durante os vindeiros días iremos publicando unha serie de entradas nas que falaremos máis polo miúdo do máis chamativo da feira.