Mostrando entradas con la etiqueta opinión. Mostrar todas las entradas
Mostrando entradas con la etiqueta opinión. Mostrar todas las entradas

4 nov 2011

Día da Ciencia en Galego

Hoxe 4 de novembro, conmemórase o II Día da Ciencia en Galego. Esta convocatoria ten como obxectivo exaltar o papel da Ciencia na creacion e profundamento da Cultura Galega. Este ano está dedicado ás figuras de Afonso X, Ramón Aller, James Clerk Maxwell, Marie Curie e María Wonenburger.



As entidades convocantes son ENCIGA, AGAPEMA, APETEGA, Cgendl, SGAPEIO, IGACIENCIA, Universidade da Coruña, Universidade de Santiago, Universidade de Vigo, ILG, CIG-Ensino, STEG, NEG, AS-PG, A Mesa, Deputación de Lugo, Deputación de A Coruña, Adega, Prolingua, MC2, Asociación de Escritores en Lingua Galega.

Desde Mallando saúdamos a iniciativa, desexándolle un exitoso transcorrer e feliz porvir.

29 ene 2011

Nova mensaxería de Facebook. Probámola

Hai algún tempo Mark Zuckerberg anunciaba un novo servizo de mensaxería de Facebook, popularmente coñecido como 'correo Facebook', aínda que dende a compañía afánanse en afimar que non é un servizo de correo electrónico, senón unha utilidade para xestionar diferentes xeitos de comunicarse nun mesmo sitio: mensaxes de Facebook, sms, correo electrónico @facebook.com e chat de Facebook.

A activación dunha conta de correo @facebook.com é quizáis unha das novidades máis destacadas, que podemos elixir durante unha sinxela configuración en catro pasos.

Paso 1. Explicación do servizo
Paso 2. Activación do correo @facebook.com
Paso 3. Activación do correo procesada
Paso 4. Activación do servizo de mensaxes de texto
Este último paso non o puiden levar a cabo xa que na listaxe de países dispoñíbeis non figura España (nin Francia...), pero si outros países da contorna como Portugal, Reino Unido ou Italia.

En canto á mensaxería, atopámonos que o resultado da combinanción é  mensaxe privada, correo electrónico e chat nun mesmo fío para mensaxes enviadas dende a conta de correo electrónico que o usuario co que contactamos ten asignada a Facebook.


Como vemos na imaxe anterior, a mensaxe privada que me enviou Vítor, e o correo electrónico dende o seu correo vencellado a Facebook ao meu enderezo @facebook.com só se distinguen nunha pequena icona que amosa a procedencia.

Comentar que a resposta que eu lle faga vai polo último método empregado. É dicir, como el me enviou dende o correo, a miña resposta chégalle ao correo (e tamén ao fío en Facebook mensaxes se ten activado o novo servizo de mensaxería).

Doutra banda, as mensaxes que nos envíen ao noso correo dende enderezos de e-mail non vencellados aos non rexistrados polos nosos contactos en Facebook, irán a un cartafol chamado Outro, algo positivo se entendemos a rede social como rede social e non como o noso enderezo electrónico de referencia.

Comentar tamén que soporta o envío e recepción de arquivos axuntos e a posibilidade de sacar unha foto ou gravar un vídeo directamente coa webcam para enviar como axunto.

Tamén falabamos de que esta nova mensaxería de Facebook incluía o chat. Que pasa entón cando iniciamos un chat coma sempre?


Pois que se suma tamén ao fío aberto con ese contacto:



En definitiva e resumindo, a miña opinión é positiva como servizo de valor engadido da rede social, mais non cambiaría o meu servizo de correo electrónico persoal, xa que creo que a rede social máis "íntimo", entre aspas. Inda que con estas cousas xa se sabe, para gustos, as cores.

16 ago 2010

Operadores Móbiles Virtuais

Simyo, Masmovil, Pepephone... son só algúns exemplos de Operadores Móbiles Virtuais (OMVs), que están a revolucionar o mercado da telefonía móbil, sobre todo no que ten a ver con prezos low cost.

Trátase de compañías de telefonía móbil sen espectro radioeléctrico, é dicir, non teñen antenas, polo que alugan este a outro tipo de operadores móbiles, os chamados Operadores Móbiles con Rede (OMR). No caso español, temos 4 OMRs: Vodafone, Movistar, Orange e Yoigo, se ben é certo que os únicos que dan cobertura ás OMV son os 3 primeiros, debido ao tardío depregamento da rede por parte de Yoigo, que índa mantén acordos co resto de OMRs para chegar aló onde non ten despregada a rede.

Tipos de OMV

En termos xenéricos, téñense dous tipos de OMVs: OMVs revendedores ou OMVs completos

Os primeiros carecen de calquera elemento de rede, limitándose a facer tarxetas SIM para poñer no mercado. Non dispoñen de numeración propia (é o OMR quen lles cede unha serie de números). Xeralmente, o seu negocio vén dado polo modelo da "venda ao por maior". É dicir, o OMV merca unha cantidade importante de minutos e mensaxes, polo que o prezo que paga ao OMR é significativamente menor. Iso permítelle revendelos tamén a menor prezo; de aí que estas compañías baseen a súa oferta en prezos por minuto inferior e non adoiten dispoñer de módulos de aforro.

Mais se cadra, os máis destacados son os OMVs completos. Este tipo de operadores dispoñen de toda a infraestrutura que precisa un operador agás o elemento final: a rede. É dicir, posúen os seus propios rexistros de localización HLR e centro de conmutación de telefonía móbil (ou MSC), o que lle permite unha flexibilidade total, posto que pode mudar de OMR cando queiran (e mesmo usar varios a un tempo) e facer coa rede o que queiran, dentro das posibilidades tecnolóxicas. Ademais dispoñen de numeración propia.

Dicía que esta subdivisión é de forma xenérica, posto que algúns autores prefiren diferenciar os OMV polo potencial mercado ao que van dirixidos:

- Orientados a empresas
- Orientados a prezos baixos: o seu obxetivo é ofrecer o menor prezo por minuto ou mensaxe.
- Orientados a grupos de interese. Buscan o seu mercado en grupos de interese específicos (clubes de automobilismo, étc).
- Orientados a étnias: semellantes ao anterior, pero relacionados con comunidades inmigrantes. Ofrecen prezos baixos para chamar a determinados países. (Fin dos locutorios?)
- Gratuítos ou case gratuítos. Baséanse na publicidade ao usuario. Inda está por desenvolverse en España
- Baseados no fenómeno de converxencia. Proporcinan telefonía móbil e todas aquelas tecnoloxías inarámbicas no camiño de facer converxer fixo e móbil.

Aspiracións dos OMV

Hai quen non se conforma con ser OMV. Así, os OMV vencellados ás comercializadoras de cable (R en Galiza, Telecable en Asturias, Euskaltel en Euskadi e Ono no resto do Estado), veñen de asinar un convenio de colaboración para unirse formando o quinto operador móbil do Estado con rede propia. Esta unión estratéxica é unha nova moi importante para a evolución da telefonía móbil, xa que a asignación de espectro radioléctrico a esta cooperativa permitiríalles investir en rede propia naqueles territorios onde dan servizo.

Como exemplo práctico, a implantación do 4G. Cando o Goberno teña a ben licitar (que xa vai sendo hora, dito sexa de paso) as licenzas do 4G, non cabe dúbida de que as operadoras grandes recibirán parte do pastel. Poñamos por caso, Vodafone. E como vai implantar a nova rede Vodafone? Pois comezando por aqueles núcleos con maior índice poboacional, onde comezará a gañar cartos antes; léase Madrid, Barcelona, Valencia, Sevilla... Que vantaxe ten que se lle asigne espectro á unión das cableras? Pois que ao tempo que Vodafone (Movistar, Orange...) comezan a implantar nas grandes cidades do Estado, R comezará a investir en 4G nas cidades galegas, Telecable nas asturianas... etc.

Crónica dunha morte anunciada

Coa posta en marcha da Orde Ministerial CTE/601/2002, foron moitas as empresas que emprenderon a fazaña de convertirse en OMVs, o que deu lugar a un amplísimo catálogo de operadores. Empresas que nada tiñan que ver coa telefonía móbil, como os supermercados Carrefour, Día ou Eroski; o banco Bankinter, o club de automobilismo RACC ou a compañía aérea Vueling.

Mais, hai mercado para todos? Demostrouse que non. Así, Vueling móbil convertiuse no primeiro OMV en desaparecer. Hai quen aposta cal será o seguinte en caer. Se 2 (ou 3, ou 4..) operadores ofrecen o mesmo (mesmo prezo, mesma cobertura), ten sentido que existan?