Sobre o peche de Chuza! e Vieiros

En Mallando na e-ira un dos nosos principios fundacionais é o de publicar entradas, sobre diferentes ámbitos científicos en galego, a lingua que empregamos, como diciamos no noso primeiro post, porque nos gosta, porque nos sae de dentro. E tamén porque queremos contribuír ao uso normal da nosa lingua, demostrando que o seu uso é posible en todo ámbito, no noso caso un blogue sobre diversos aspectos científicos e tecnolóxicos.

É por iso que nos entristece profundamente o peche, esta pasada fin de semana, de Vieiros e Chuza!. Estes peches deixan a xa moi reducida presenza do galego nos medios informativos na rede na súa mínima expresión, e constitúen unha moi mala nova para a nosa lingua, nunha das canles, a rede, con máis potencialidade para a aparición de iniciativas capaces de contribuir positivamente á normalización da lingua galega.

Desde Mallando na e-ira reafirmámonos no noso compromiso de uso e defensa da nosa lingua, a lingua galega, contribuíndo co noso graíño de area á presenza normalizada da nosa lingua na rede. Así mesmo, desexamos que a estes peches, causados máis pola crise económica (no caso de Vieiros) que por motivos de falta de demanda, non se una ningún outro que deixe aínda máis mermada a presenza do galego na rede. Por último, esperamos a pronta presentación dunha nova iniciativa de medio informativo en lingua galega que sexa quen de continuar coa necesaria labor de normalización da lingua no ámbito dos medios informativos na rede.